OFA YA CHELSEA YAWEKWA KAPUNI.

Ofa ya paund million 52 iliyotumwa na uongozi wa klabu ya Chelsea kuelekea huko Vicente Calderón Stadium yalipo makao makuu ya klabu ya Atletico Madrid kwa ajili ya kutaka kumsajili mshambuliaji wa kimataifa toka nchini Argentina Sergio Leonel "Kun" Agüero del Castillo pamoja na beki wa kimataifa toka nchini Uruguay Diego Roberto Godín Leal imewekwa kapuni.

Ofa hiyo imewekwa kapuni kufuatia maazimio yaliyofikiwa kwenye kikao cha bodi kilichofanyika usiku wa kuamkia hii leo ambapo wajumbe wa bodi hiyo wamepinga vikali utaratibu wa kuwaruhusu wachezaji hao kuondoka.

Msemaji wa klabu ya Atletico Madrid amesema ilikua ni vigumu kwa wajumbe wa bodi wa klabu hiyo kukubaliana na ofa iliyotumwa klabuni hapo ambapo wengi wao walieleza wazi wachezaji hao bado wanastahili kuendelea kuwepo huko Vicente Calderón Stadium.

Mbali ya kukataa ofa hiyo ya klabu ya Chelsea pia bodi hiyo ilikataa ofa ya klabu ay Real Madrid ya paund million 39 iliyokua imemlenga mshambuliaji Sergio Agüero pekee yake.

Sergio Agüero mwenye umri wa miaka 22, alisajiliwa na klabu ya Atletico Madrid mwaka 2006 akitokea Club Atlético Independiente, huku Diego Godin alisajiliwa na klabu hiyo mwaka 2010 akitokea Villareal ya nchini Hispania.